كان ياما كان..
في قديم الزمان..
دوار كبير فيه ألف جنان وجنان..
حسبوه مدينة وسماوه وزان..

الخير كان فكل مكان..
زيت وزيتون، كرموس ورمان..
دار الضمان فيها الأمن والأمان..
الكل هاني، ناشط وفرحان..

تبغي الزين تقصد وزان..
ولحسن الخلق كانت عنوان..
العلم والشرف قديم من زمان..
غي تقول وزاني، يرفعو لك الشان..

ّّّّّّّّّّّّّّّّّّّّّّ

مشات شهور وجات شهور
ومدينة وزان جاها الفتور
كي حمار الرحى فبلاصتو يدور
وزان مسكينة مات لا (مات لها) الشيفور..

مسؤول يجي ومسؤول يمشي..
هادا يكذب.. لاخر يرشي..
خربو لبلاد..ما تهناوشي
شنو بغاو اخر.. ما عارفشي

وجا الكنفاوي زاد كملها..
واقلع العين اللي الهلاوي عورها..
وعمات وزان وبقات ف ظلامها
اللي داز عليها يقول الله يرحمها

ّّّّّّّّّّّّّّّّّّّّّّ

أ عيييييقو وفيقو يا هاد الناس..
السباسا را دوخو لكم الراس
ويدا تبعتو غي الكيف والكاس
عمر البيضة توقف ف الطاس

هانا تكلمت.. واش سمعتي؟؟
شوف فين كنتي وفين وليتي
باغي ترجع كيف ما كنتي؟؟
والله وما قفلتي.. لا فورتي