مدونة خالد

الجزء الشفاف.. من مفكرتي

الحي الشعبي.. مول الكورة.. والجنية

هادا واحد العايل تولد فحي شعبي فقير.. غي بدا الخطوات الأولى ديالو باه عطاه كورة.. الوليد ما عارفشي منين جات الكورة.. وما كيهموشي يعرف.. المهم هو بما أنه مول الكورة -كما يعرف جميع أبناء الأحياء الشعبية- فهو اللي من حقو يختار شكون يلعب وفاين وفوقاش هتسالي المباراة.
فالبداية، العايل المزيون كان كيلعب معه كلشي، وخا كيكون العدد زايد، مرة يعمل الداخلة مرة يطلب السماحة من اللي ما لعبوشي... المهم كان مزيان معهم.. شوية شوية بدا يكبر وبدا يحس بأهمية الكرة اللي عندو وأن اللي معه كيموتو على دك الكورة.. وعرف أنها فالأصل ماشي ديالو وأن باه غي خداها للوالدين دهادو اللي كيلعبوم معه بها.. خاف تضيع له.. خاف ما تبقاشي عندو دك القيمة اللي كيعطيوها له ولاد الحومة، حيت إذا ولات الكورة د كلشي هيكون من حق كلشي يختار شكون يلعب.. ودك الساعة هيولي الكوايري الحقيقي ضامن بلاصتو واللي غي كيخربقو هيجلسو يتفرجو.. وهو ما عندوشي مع دك الكوايري اللي باه سبق له سجل هدف ف باه، وما عندوشي مع الكوايري لاخر حيت وخا سبرديلتو مقطعة وكيبان ضعف منو عمرو خلاه يدوز..
الولد جاتو الجنية بالليل، ما خافشي منا.. حيت كان كيشوفا كتجي عند باه.. وشوشت له فودنو.. ابتسم ابتسامة عريييييضة.. ونعس.. ماشي شي نعااااس.. حيت كان يتسنى ف الصباح يجي داغيا باش يعمل اللي قالت له الجنية..
جا الصباح، وعلى غير العادة ما خرجشي عند ولاد الحومة.. طلع للسطح وتسناهم حتى تجمعو: الدراري.. ولينا بزاف.. واللعب ما بقاشي مزيان.. ما بقاشي الواحد يلعب تا يشبع.. علاش ما نعملوشي دوري؟؟ رحب الجميع بالفكرة.. وطلب منوم يعدلو لفراقي والقرعة ودكشي.. طبعا هنا بدا الغوت والدباز بين اللعابة فلان يلعب معانا لا معكم لا فلان كيضرب ما يلعبشي أصلا علااش شكون نتوما اللي تختارو حنا اللي كنعرفو نلعبو لا حنا اللي قدم منكم ف الحومة نتوما عاد جيتو من الدوار... وف هاد اللقطة كانو كلاو الطعم..
وقبل ما يعيقو وينتبهو عيط مول الكورة على شي صحابو: منير، فؤاد، المعطي، الجيلالي.. طلعو عندي للسطح عاونوني نجمع النشير علابد ما يساليو لفريق.. فهمو الميساج.. طلعو بالزربة للسطح.. وبداو يلعبو مع بعضم بارديدو مزيون ونقي واللعابة قلال.. وكلما قربو اللي لتحت يعيقو كيطلل شي واحد من السطح كبين لشي فرقة أنها تقولبت ف القسيم هتخسر داغيا باش تنوض تطالب يعاودو من الأول.. ويدا تزيرت القضية مزياااان وما لقاو كي يعملو يخربقو لفراقي كيطلل مول الكورة وكيعطي شي بلان جديد مثلا ما بغيناشي 8 د لفراقي بغينا 16 ولا الفرقة خص يكون فيها واحد دبوز يشد المرمى... وطبعا ما كاينشي اللي يقول لا حيت هو مول الكرة.. وكيعاودو لفريق من جديد..
أما اللي ف السطح، ناشطين مع راسوم.. ولاعبين فواحد الدوري غي صغير.. سميتو على ما قالو والله أعلم خدام الكورة.
نشر

 

الاشتراك في: تعليقات الرسالة (Atom)